Kuryente sa Cebu City mabalik sa unang semana?
By Ivan Rey Tan
SI Cebu City Mayor Michael Rama nipahibawo nga hingpit nang mahibalik ang kuryente sa Sugbo sa unang semana sa Enero, 2022.
Sa press conference sa Lunes, Disyembre 27, 2021, si Rama niingon nga giatiman na karon ang kuryente ug gipasalig ni Secretary Alfonso Cusi sa Department of Energy nga ma-energize ang Sugbo sugod sa unang semana sa Enero sunod tuig.
Giawhag usab ni Rama ang Visayan Electric nga magsugod na sa pag-adto sa mga bukirang barangay tungod kay wala kaayo’y problema didto kon hisgotan ang mga basura ug mga babag sa agianan tungod sa bagyong Odette.
“I want them to have people to do it because I hate if the poor is not being attended to,” matod ni Rama.
Hangtud sa alas 12 sa udto sa Disyembre 27, ang Veco nakahimo sa pag-energize sa 98,321 gikan sa 474,182 ka apektadong mga kustomer, ug nabalik ang 288 o 52.9% sa 544 ka linya sa kuryente, sulod sa franchise area niini.
Ang mayor niingon nga positibo siya nga mabalik ang kuryente sama sa gipahibawo.
Nidugang ang mayor nga si Cusi nakatutok ning butanga uban si Presidente Rodrigo Duterte.
“Once power is already installed, I am telling you that everything will just follow,” matod ni Rama.
Gipahibawo sa Visayan Electric sa Dominggo, Disyembre 26, nga ang 100 porsyento nga pagpahiuli sa kuryente sa tibuok nga lugar sa ilang franchise mahuman sa Enero 31, 2022.
Moabot sa 166 ka lineman gikan sa lain-laing electric companies sa nasod ang nitabang sa Visayan Electric nga nagdala sa kinatibuk-ang 725 ka personnel nga nagtrabaho aron mabalik ang kuryente sa Sugbo.