Tindahan naugdaw sa Pasko
by Edgar Fuerzas
NAGMINGHOY ang usa ka negusyante sa naugdaw niya nga tindahan alas 10:05 sa buntag, Sabado, Disyembre 25, 2021, sa probinsya sa Cotabato.
Sa taho gikan sa Bureau of Fire Protection (BFP)-Makilala, nakadawat sila og tawag sa natigayon nga sunog sa Barangay Malasila.
Abtik nga nagresponde ang kabomberohan apan pag-abot nila sa dapit nga nasunugan, dako na kaayo ang kalayo.
Gipasiritan dayon og tubig sa BFP ang nagdilaab nga kalayo sa nasunog nga tindahan.
Taud-taod ang milabay, napalong na ang kalayo ug wala na kini mitabok sa uban nga tindahan lakip sa panimalay.
Sarado ang J4 store nga gipanag-iyahan sa negusyante nga si Martin Pagaran, nga niadtong orasa didto sa ilang balay nga nagsilibrar sa Pasko.
Apil sa naugdaw sa sunog ang usa ka Elf truck, traysekil, usa ka daan nga sakyanan ug mga sulod sa tindahan.
Sa kasamtangan ang BFP-Makilala ang padayon nga nag-imbestiga sa hinungdan sa maong sunog ug danyos niini.
