LA Lakers gisungag sa Bulls
BANGIS nga nibalik si DeMar DeRozan gikan sa duha ka mga semana nga pagkatanggong sa Covid-19 health and safety protocols ug nagpakatap kini’g 38 puntos aron agakon ang hosts Chicago Bulls ngadto sa kadaugan batok sa Los Angeles Lakers, 115-110, kagahapon, Disyembre 20, 2021 (RP time) sa National Basketball Association (NBA) 2021-22 season.
Ang Bulls, nga ningsaka sa 18-10 nga rekord – ikaduha sa Eastern Conference – nakadawat sab og 19 puntos ug 13 rebounds gikan ni Nikola Vucecic ug laing 19 puntos gikan ni Lonzo Ball.
Ang Lakers, nga natagak sa 16-15 nga rekord – ikapito sa Western Conference – gipangulohan ni LeBron James pinaagi sa iyang 31 puntos, nidugang og 21 puntos si Carmelo Anthony samtang nihatag og 20 puntos si Russell Westbrook.
Sama sa naandan, ang Bulls nisalig og maayo kang DeRozan ug wala sila gipakyas sa All-Star guard.
Si DeRozan nakapasulod og jumpshot unya iya kining gisundan og duha ka freethrows aron hatagan og 113-110 nga labaw ang Bulls sa nahabiling 15.6 segundos.
“It’s an honor to be trusted in those moments,” asoy ni DeRozan. “I never take it for granted. It’s an adrenaline rush that you can’t duplicate, so you try to make the most of it every time you’re put in that position. There’s nothing like it. You’ve got to take the good with the bad, and I’m willing to take both.”
Ang Bulls adunay upat ka mga magduduwa nga wala nakapakita og aksyon tungod sa isyu sa Covid-19 outbreak samtang ang Lakers adunay unom. (AP)