Garcia higpit mi-ban sa pabuto, fireworks
by Roger E. Vallena, Benjie B. Talisic
Aron malikayan ang sunog taliwa sa pagkatumba sa daghang mga kahoy, pagkaguba sa mga balay hinungdan sa pagkatag sa daghang mga dapat sa balay, gidili ni Gobernador Gwendolyn Garcia ang paggamit sa pabuto, fireworks ug uban pang matang sa pyrotechnics.
Tungod sa kadaghan sa gas station nga nisangko sa kakuwang sa supply sa fuel, daghang mga panimalay ang nagtipig og mga gasolina sa ilang mga balay ug garahianan.
Niini, nanaghan og maayo ang mga dapit nga maisip nga fire hazard human sa bagyong Odette nga mikuso-kuso sa sentro ug habagatang Sugbo sa Disyembre 16 sa gabii.
Ang bagyo mi-landfall sa Dakbayan sa Carcar nga dunay gikusgong 175 kilometro matag takna duol sa sentro ug unos nga 240 kilometro matag takna.
Miresulta kini sa blackout sa tibuok Sugbo human mangaputol ang mga linya ug towers sa National Grid Corporation of the Philippines (NGCP) nga nag-supply og kuryente sa tibuok isla.
Ang dagkong mga balay patigayon, condominium units ug business process outsourcing nigamit og daghang fuel samtang dunay nangaguba nga gas stations ug duna say wa makaandam og generator sets, hinungdan nga medyo nagkuwang ang supply bisan kon gipaneguro sa oil firms nga dunay igong gidaghanon.
Apan daghan sa mga gas station nga bukas ang kanunay mahutdan og supply tungod sa kadaghan sa magpatubil.
“The fallen trees and plants as well as the storage of gasoline and diesel fuel have practically turned the entire island of Cebu into a fire hazard,” matod sa tipik sa executive order ni Garcia nga gipetsahan og Disyembre 24, 2020.
Matod sa gobernador, iyang giluwatan ang kamandoan kay naandan na ra ba sa mga Sugboanon ang paggamit og mga pabuto ug pyrotechnics samtang nag-angat ang Pasko ug Bag-ong Tuig.
Matod ni Garcia, kining firecrackers ug fireworks ban magpadayon hangtod nga iyang malibkas ang state of calamity sa tibuok lalawigan.
WAY NABUTHAN
Way nabuthan sa dakbayan sa pagsugat sa Pasko, pahibawo ni SFO2 Wendell Villanueva, tigpamaba sa Cebu City Fire Office (CCFO) sa Superbalita Cebu.
Matod ni Villanueva, sa ilang pag-monitor, walay natala nga nabuthan sa pabuto sa pagsugat sa Pasko gikan sa alas 7:00 sa gabii sa Disyembre 24 hangtod na sa Disyembre 25, 2021.
Dugang ni Villanueva nga nakahatag usab og tabang ang walay suga sa daghang mga barangay tungod kay ngitngit ang palibot sa pagsugat sa Pasko hinungdan nga wala kaayoy nagpabuto.
Nanghinaut si Villanueva nga subling mahitabo unta nga way mabuthan sa pabuto sa pagsugat unya sa Bag-ong Tuig. (REV, BBT)