Health protocol ipatuman sa kapulisan

Human sa bagyong Odette sa dakbayan sa Sugbo, misamot pa ka daghan ang mga tawo nga nanaglinya sa mga ATM machine ug water refilling stations nga nakahatag og kabalaka sa kapulisan nga dili na masunod ang health protocol.

Tungod niini, adunay mga pulis nga gitahasan sa Cebu City Police Office (CCPO) nga mosuroy aron ipatuman ang mga lagda sa kagamhanan sa dakbayan sa Sugbo labot sa minimum health standard.

Matod ni Police Lieutenant Colonel Ryan Devaras, deputy city director for administration sa CCPO, nga ang buhaton sa mga pulis mao ang pagbadlong lang una sa mga tawo nga wala mosunod sa health protocol.

Kini sama sa social distancing ug kanunay nga pagsul-ob sa facemask diha sa publikong mga lugar.

Nabantayan sa kapulisan nga daghang mga tawo ang nag suroy-suroy sa IT Park ang wala na motuman sa health protocol nga gumikan niini ila lang nga badlungon.

Giklaro hinuon ni Devaras nga gumikan kay naa pa sa kalisud ang mga tawo tungod sa kadaot nga mugna sa bagyo, walay himuon nga dakop ang mga police.

“Mobadlong gihapon ta but we are somehow lenient as of now because of the situation. We will just remind them kay lisud man sad rong sitwasyona,” matod ni Devaras.

Awhag sa kapulisan sa siyudad sa Sugbo ngadto sa mga Sugboanon nga ipadayon ang pagsul-ob sa facemask ug social distancing tungod kay naa pa ang coronavirus.

Gikabalak-an sa kapulisan nga mosaka ang mga kaso sa Covid sa mosunod nga mga semana kon ang publiko dili na mosunod sa health protocol.

Daghang mga tawo ang midangop sa ATM tungod kay way mga establisemento nga modawat og credit ug debit card, cash ra.

Kini tungod sa di maayong internet connection sa kadaghanang mga dapit sa Metro Cebu. (AYB)