Ancajas naa na’y laing kontra
By Erwin Lirazan
HUMAN nakanselar ang miagi niyang away, adunay kahayag nga mianinag sa agianan ni International Boxing Federation (IBF) super flyweight champion Filipino Jerwin Ancajas.
Kon wala’y kakulian nga mahitabo, posibleng depensaan ni Ancajas (33-1-2, 22KOs) sa ika-10 nga higayon karong Pebrero 5, 2022 batok kang Argentinian Fernando Daniel “Pumita” Martinez (13-0, 8 KO’s) sa wala pa matino nga venue.
Si Ancajas, 29, nakaeskedyul untang mosagubang sa labing dako niyang away batok kang 4-division champion Japanese Kazuto Ioka (27-2, 15 KO’s) karong Enero 31, 2021 sa Japan.
Apan gumikan kay gipahugtan og balik sa Japan ang ilang restriksyon kalabot sa Covid-19, nakanselar kini sa wala damha.
Gikuha isip hulip kang Ancajas aron makigharong kang Ioka mao ang kababayan niining si Ryoji Fukunaga (15-4, 14 KO’s).
Ang gikaintapang panagharong nila ni Ancajas ug Ioka giplanuhang i-eskedyul og balik sa sunod tuig.
Si Ancajas katapusang miaway niadto pang Abril 10, 2021 diin midaog siya batok kang Mexican Jonathan Javier Rodriguez pinaagi sa unanimous decision.
Ang kampo ni Ancajas nangita’g paagi aron mahatagan og away ang ilang batos gumikan kay nagpanikad na kining mobalik og saka sa ring.
Batok kang Martinez, gilaumang makasugat og saktong dekalidad nga binukbokay si Ancajas.
Dili man tuod daghang mga away ang nasagubang ni Martinez isip professional boxer apan nahanas og maayo ang abilidad niini sa amateur rank