Seguridad sa paghatag sa ayuda hugtan

HUGOT nga siguridad ang ipatuman sa kapulisan sa Siyudad sa Sugbo kon sugdan na ang pagpanghatag og ayuda gikan sa Kagamhanan sa Dakbayan ug sa national government alang sa mga biktima sa bagyong Odette.

Atol sa pagbisita ni Presidente Rodrigo Duterte sa Siyudad sa Sugbo, iyang gisaad nga hatagan og ayuda ang mga kabus nga nabiktima sa bagyo.

Tungod niini, gipanglantawan sa kapulisan nga modagsa ang daghang mga tawo nga molinya aron modawat sa financial assistance.

Matod ni Police Lieutenant Colonel Clark Arriola, hepe sa City Intelligence Unit sa Cebu City Police Office, nga andam kanunay ang mga pulis nga mohatag sa siguridad ilabi na nga daghang mga tawo ang modugok.

Pasabot ni Arriola nga ta­nang mga butang ang ilang gipangandaman sama sa kriminalidad ug ang pagpatuman sa minimum health standard sama sa social distancing.

Sigun sa police official nga dili pa angay nga kakompyansahan karong mga panahona bisan kon ubos na kaayo ang kaso sa Covid 19 apan naa pa nga peligro nga mokatap kon dili mosunod ang katawhan sa mando nga tumanon ang health protocol.

Makig-alayon usab ang CCPO sa Cebu City hall ug Department of Social Welfare and Development (DSWD) 7 alang sa adlaw kanus-a himuon ang pagpanghatag sa ayuda.

Aduna nay pamaagi ang kapulisan nga giandam aron dili magpunsisok ang mga tawo sa usa ka dapit kon asa ihatag ang hinabang nga mao usab ang ipresentar sa CCPO ngadto sa Kagamhanan sa Siyudad.

HINABANG

Moabot sa 100,000 ka mga pamilya nga naapektuhan sa pagkuso-kuso sa bagyong Odette makadawat og hinabang gikan sa Pitmasters Foundation.

Ang Pitmasters Foundation, naabot dinhi sa Sugbo sa Disyembre 18, 2021, alang sa ilang gipahigayong assesment.
Mibalik sila sa Lunes, Disyembre 27, aron paghatag sa pasiunang hinabang alang sa mga Sugbuanon nga naapektohan sa bagyo.

Ang mga hinabang naglangkob sa bugas, canned goods, kape, gatas ug uban pa.

Si Atty. Caroline Cruz, executive director of Pitmaster Foundation nga nahinabi sa mga tigbalita, nibutyag nga giabagan sila sa mga sakop sa Philippine Navy.

Sumala pa niya nga pasi-una lang nga dunay 100,000 ka pamilya ang makabenipisyo sa mga essential goods nga ilang ihatag sa mga naapektohan.

Ilang hatagan ang Probinsya sa Sugbo, kalungsuran, dakbayan sa Sugbo, ingon man ang Siargao, Southern Leyte, ubang mga lugar sa Mindanao.

Gibutyag niya nga tumong ug tuyo sa ilang chairman, Charlie “Atong” Ang, nga ma­pa­dali ilang pag-abag sa Visayas ug Mindanao.

Ilang gikaabag sa logistics ang Philippine Navy, Marines reserved 72- Marangal Batallion Manila, Naval Reserved Center ug Eastern Visayas. (GPL, BBT)